OS DEFENSORES DO POBO RENDERÁN HOMENAXE A MIGUEL ÁNGEL BLANCO EN A MERCA POLO 20º ANIVERSARIO DO SEU ASASINATO

29 Setembro, 2017 Institución, Novas

Defensores do pobo de toda España desprazaranse o próximo 3 de outubro ao concello ourensán de A Merca onde está sepultado o concelleiro de Ermua asasinado hai 20 anos a mans da banda terrorista ETA.


Santiago de Compostela, 29 de setembro de 2017.
Defensores do pobo de toda España desprazaranse o próximo 3 de outubro ás 19.30 horas ao cemiterio da parroquia de Faramontaos, no concello ourensán de A Merca, para render tributo, polo vinte aniversario do seu asasinato a mans de ETA, ao concelleiro Miguel Ángel Blanco, que permanece alí sepultado.

O acto estará presidido polo defensor del pueblo en funcións, Francisco Fernández Marugán, e pola valedora do pobo, Milagros Otero Parga, promotora desta iniciativa que coincide coa celebración en Santiago das XXXII Xornadas de Coordinación de Defensores do Pobo.

Na homenaxe tomarán parte ademais a irmá do concelleiro asasinado, Marimar Blanco, e o alcalde de Ermua, Carlos Totorika.

Os defensores depositarán un centro de flores no monumento levantado no exterior do camposanto de Faramontaos en A Merca. Lembrarán nos seus discursos a este concelleiro que o 13 de xullo de 1997 foi brutalmente asasinado a mans de ETA.

Os restos de Miguel Ángel Blanco descansan no cemiterio de A Merca desde o ano 2007 tras decidir a familia o seu traslado tras unha década en Ermua. A relación de Miguel Ángel Blanco con este municipio de Ourense veulle por parte de nai. Aínda contan con parentes nesta zona das Terras de Celanova.

Os defensores converterán A Merca, por un día, en núcleo de lembranza do espírito de Ermua que hai vinte anos fixo saír a milleiros de españois ás rúas consternados polo inxusto asasinato dun home que traballou ao servizo da cidadanía.

The comments are closed.


GABINETE DE COMUNICACIÓN

Rúa do Hórreo, 65
15700 Santiago de Compostela
A Coruña
Teléfono [+34] 981 56 97 40
FAX [+34] 981 57 23 35

comunicacion@valedordopobo.gal