Tras a recente conmemoración do Día Mundial de Concienciación sobre o Autismo, unha representación da Federación Autismo Galicia realizou hoxe unha visita institucional ás dependencias da Valedora do Pobo. O encontro celebrouse a petición da Valedora coa idea de afondar nas principais problemáticas que afectan ás persoas con transtornos do espectro autista (TEA) na nosa comunidade.
Participaron na xuntanza a presidenta da Federación Autismo Galicia, María José Álvarez Folgar; a xerente da Federación, Patricia Blanco Riveiro e o tesoureiro da mesma, José Manuel Varela Rodríguez. Por parte da Valedora do Pobo, ademáis da Valedora do Pobo, Milagros Otero Parga, tomaron parte na mesa de traballo o secretario xeral da institución, Fernando de Andrés Alonso e a coordinadora xeral, Beatriz González Moreno.
O encontro permitirá establecer vías de coordinación para tratar de dar resposta ás persoas con TEA no eido da prestación de servizos públicos, da eliminación de barreiras de comunicación e de atención ás súas necesidades específicas.
A institución da Valedora do Pobo, por outra parte, iniciou hoxe o camiño para adaptar as súas dependencias ás necesidades das persoas autistas. Con axuda da Federación, dotará os apoios necesarios ás instalacións da defensoría con sistemas alternativos e aumentativos de comunicación como pictogramas ou fotografías. Trátase de dar apoios tanto as persoas con TEA como ao resto da cidadanía para mellorar a comunicación e a prestación de servizos.
