O valedor do pobo plantará mañá árbores no Bosque de Galicia da Cidade da Cultura

07 Maio, 2015 Institución, Medioambiente, Novas

O valedor do pobo, José Julio Fernández Rodríguez, e o persoal da súa institución desprazaránse mañá á Cidade da Cultura para facer a súa aportación ao Bosque de Galicia mediante a plantación de vinte exemplares de especies autóctonas. Con esta iniciativa simbólica, o Valedor do Pobo amosa o seu compromiso na defensa dos valores ambientais da nosa comunidade.

Coa plantación, o alto comisionado parlamentario contribúe a poboar o bosque, que no futuro estará ocupado por unhas dez mil especies autóctonas, entre as que se atopan  bidueiros, carballos, espiños, serbais, castiñeiros e loureiros.

O acto de mañá é posible grazas á colaboración coa Fundación Cidade da Cultura e a Consellería de Cultura, Educación e Ordenación Universitaria que facilitan ao Valedor do Pobo tanto as árbores, o terreo e as ferramentas empregadas.

O Valedor do Pobo mantén un estreito compromiso para coa preservación do medio ambiente. Non son poucas as queixas que tramita cada ano en relación a estas cuestións e á preserva da contorna. Resultan habituais, deste xeito, as súas actuacións nos casos en que a intervención humana ocasiona danos á calidade ambiental e paisaxística en zonas da nosa comunidade.

Hai un ano, o Valedor do Pobo participou tamén na  reforestación con castiñeiros na zona do Courel (na imaxe). Co acto de mañá, a institución refrenda este compromiso medioambiental e contribúe a repoboación desa área da cidade de Santiago.

The comments are closed.


GABINETE DE COMUNICACIÓN

Rúa do Hórreo, 65
15700 Santiago de Compostela
A Coruña
Teléfono [+34] 981 56 97 40
FAX [+34] 981 57 23 35

comunicacion@valedordopobo.gal