Escolares de Boqueixón achegaron máis de 40 peticións á valedora durante a súa visita ao CPI Antonio Orza

31 Outubro, 2018 Institución, Menores, Novas

Milagros Otero Parga, valedora do pobo, celebrou onte unha xornada de visita a  Boqueixón para achegar os servizos da institución que preside á cidadanía.

 Santiago de Compostela, 31 de outubro de 2018. A valedora do pobo, Milagros Otero Parga, celebrou onte en Boqueixón unha xornada de visita para achegar os servizos da institución que dirixe á cidadanía. Os escolares de 5º e 6º de Educación Primaria do CPI Antonio Orza achegáronlle medio cento de peticións para o seu centro, para as súas aldeas e para o concello en xeral, que hoxe mesmo foron rexistradas pola institución para darlles resposta.

A xornada de visita a Boqueixón permitiu á valedora, Milagros Otero Parga, reunirse inicialmente co alcalde e membros da corporación co obxecto de coñecer as principais necesidades do concello e de establecer canles fluídas de comunicación que permitan axilizar as queixas que afectan a este municipio.

A valedora ademais desprazouse ao CPI Antonio Orza, no lugar do Forte, onde mantivo un encontro de máis dunha hora con rapazas e rapaces de 5º e 6º de Primaria. Durante o mesmo puideron coñecer un pouco máis a institución do Valedor do Pobo, como funciona, e de que xeito pode axudar á cidadanía.

Os escolares tornáronse nos verdadeiros protagonistas da sesión, na que estiveron presentes tamén representantes da veciñanza da localidade que foron convidados expresamente.

Os rapaces tiñan preparadas cadansúas peticións e/ou queixas dirixidas á valedora. A maior parte delas centráronse en demandar melloras para o seu centro. Así pediron mellorar a súa dotación informática, reformar o tellado e as fiestras do centro, optimizar o sistema de calefacción e mesmo dotar aos espazos comúns con máis equipamento deportivo, bancos, randeeiras e unha zona cuberta nos accesos ao colexio.

Os alumnos demostraron unha grande madurez á hora de expor as súas peticións. Así, a valedora do pobo puido coñecer das deficiencias nos servizos de Internet nalgunhas aldeas, a necesidade de limpar montes en zonas do Concello de Boqueixón ou de instalar máis bancos e papeleiras nos espazos públicos.

Houbo quen solicitou incluso centros de día para atender ás persoas maiores, axudar ás persoas en risco de exclusión social e mesmo rematar dunha vez por todas cos conflitos armados.

A institución do Valedor do Pobo rexistrou hoxe mesmo un documento co detalle de todas as peticións achegadas polo alumnado. Unha vez estudadas e analizadas dará unha resposta aos dous cursos do centro para que coñezan o devir e cada unha delas.

The comments are closed.


GABINETE DE COMUNICACIÓN

Rúa do Hórreo, 65
15700 Santiago de Compostela
A Coruña
Teléfono [+34] 981 56 97 40
FAX [+34] 981 57 23 35

comunicacion@valedordopobo.gal