O Valedor inicia as xestións para ser membro da Asociación Internacional de Comisarios de Lingua que loita pola defensa dos dereitos lingüísticos no mundo

23 Decembro, 2014 Dereitos, Eventos, Exclusión social, Informes, Institución, Novas

O Valedor do Pobo solicitou a súa adhesión a esta entidade que ten por obxectivo unificar esforzos na defensa dos dereitos idiomáticos das persoas en todo o mundo.

Santiago de Compostela, 23 de decembro de 2014. O Valedor do Pobo mantén contacto dende principios de este ano cos representantes da International Association of Language Commisioners-IALC (Asociación Internacional de Comisarios de Lingua) co fin de formar parte desta entidade, constituída oficialmente o pasado mes de marzo, como membro de pleno dereito. Antes de que acabe o ano remitirá aos responsables da entidade toda a documentación necesaria para solicitar o ingreso na mesma, que se valorará no próximo encontro anual da asociación, previsto para maio de 2015.

A IALC foi constituída coa misión de defender e avanzar nos dereitos lingüísticos, a igualdade e a diversidade en todo o mundo. Esta organización pioneira tamén serve para ofrecer soporte profesional aos comisionados que defenden estos principios en cada un dos territorios poñendo todas as ferramentas e experiencias rexistradas ao servizo do uso dos idiomas propios.

Representantes de Canadá, Irlanda, Bélgica, Kosovo, Finlandia, Sudáfrica e Sri Lanka forman parte da asociación, da que tamén é membro fundador o Síndic de Greuges, o defensor catalán. Precisamente o Valedor do Pobo colabora estreitamente cos seus homólogos catalán e vasco na defensa dos dereitos lingüísticos dos cidadáns e son habituais os foros nos que as tres defensorías comparten as súas inquietudes.

Para o ombudsman galego a defensa dos dereitos lingüísticos constitúe un dos seus obxectivos primordiais. Manter a afondar nos modelos lingüísticos actuais da comunidade e traballar nunha boa convivencia idiomática e uso dos idiomas cooficiais en todos os terreos da administración constitúen os seus principais propósitos neste terreo. Como alto comisionado parlamentario o Valedor investiga e resolve, determina e realiza recomendacións cada ano co fin de responder ás queixas ciudadáns ao respecto de posibles vulneracións dos seus dereitos lingüísticos, aspecto este último, co que da cumplimento a un dos requisitos básicos esixidos para formar parte da IALC.

The comments are closed.


GABINETE DE COMUNICACIÓN

Rúa do Hórreo, 65
15700 Santiago de Compostela
A Coruña
Teléfono [+34] 981 56 97 40
FAX [+34] 981 57 23 35

comunicacion@valedordopobo.gal