A valedora reuniuse cos responsables de Cinexpo para regular o acceso de nenos con diabetes aos cines

08 Xullo, 2016 Menores, Novas

A valedora do pobo, Milagros Otero Parga,  reuniuse esta semana en Santiago cos responsables de Cinexpo, entidade que xestiona salas de cine en Pontevedra, Ourense e Vigo, co fin de aclarar malentendidos e regular en condicións de seguridade o acceso de nenos con diabetes a estes recintos.

Como conclusión do encontro, que se realizou nas dependencias da valedoría a petición da institución, tanto a valedora como os xestores das salas coincidiron en que o acceso dos rapaces diabéticos e outras persoas con necesidades médicas ou alimentarias específicas debe realizarse en condicións de seguridade e con todas as garantías. Neste sentido, a institución do Valedor do Pobo cre imprescindible protexer os dereitos destas persoas vulnerables e axudar tanto aos nenos con diabetes como a outros cidadáns que precisen portar medicamentos ou material sanitario específico. Estes dereitos deben ser compatibles co dereito a desfrutar do ocio doutras persoas presentes nas salas e cos requisitos de seguridade demandados polos responsables dos cines.

Para garantir estas medidas, a valedora ve razoable que as persoas con necesidades específicas poidan acreditalo aos responsables do control de acceso e que a entrada con alimentos sexa proporcional ás necesidades dos afectados de evitar posibles crises. Só deste xeito poderán equilibrarse os dereitos deste colectivo cos dereitos do resto da cidadanía a asistir ás proxeccións en condicións de seguridade.

A xuntanza foi convocada pola valedora do pobo co obxecto de aclarar malentendidos trasladados aos medios de comunicación nos últimos días. Durante a visita a Pontevedra no pasado mes de maio, representantes de familias de nenos con diabetes trasladáronlle a súa inquedanza polos problemas cos que se atopaban á hora de asistir ao cine cos rapaces portando mochilas. Tras un primeiro contacto coa xerencia do recinto en Pontevedra, no que se evidenciou a vontade de colaborar, a xuntanza de onte ven ratificar esa primeira impresión e permite avanzar na normalización das visitas aos cines de persoas diabéticas ou outros colectivos que precisen portar aparellos medidores, alimentos específicos, ou medicamentos.

The comments are closed.


GABINETE DE COMUNICACIÓN

Rúa do Hórreo, 65
15700 Santiago de Compostela
A Coruña
Teléfono [+34] 981 56 97 40
FAX [+34] 981 57 23 35

comunicacion@valedordopobo.gal