A valedora do pobo completa a tramitación parlamentaria do Informe Ordinario 2015 ante o pleno da Cámara

12 Xullo, 2016 Institución, Novas

A valedora do pobo, Milagros Otero Parga, compareceu hoxe ante o pleno do Parlamento de Galicia para expor o contido máis salientable do Informe Ordinario 2015 da institución. Con esta intervención conclúe a tramitación parlamentaria da memoria anual do Valedor do Pobo, que xa foi debatida ante a Comisión de Peticións hai unha semana.

Ademáis de expor os principais asuntos que suscitaron a preocupación da cidadanía no ano 2015, a valedora aproveitou a súa exposición para propor o seu proxecto para a valedoría nos próximos anos. “Quero conseguir unha institución máis sensible, máis aberta, máis próxima aos problemas dos cidadáns e máis eficaz na miña interlocución cos poderes públicos”, resumiu. Otero engadiu que ansía lograr uns procedementos máis rápidos e sinxelos, así como unha forma de comunicación cos cidadáns transparente. “Quero que estes sintan que a valedora está para amparalos, e que aínda que non sempre poida facelo, sempre estará á súa disposición para atender o seu caso e tentar solucionalo”, engadiu.

Milagros Otero amosou a súa confianza plena na mediación e na interlocución, así como na educación en dereitos, na cultura da paz e na necesidade de empatizar coas persoas e cos seus problemas. Para conseguilo apelou a necesidade de colaboración de todos: dos cidadáns “para que usen a institución do Valedor do Pobo para a reclamación do que necesiten” e aos poderes públicos “para que sexan máis sensibles coas necesidades das persoas e máis rápidos á hora de responder ás múltiples peticións que se lles envían”, enfatizou. Como colofón ofreceu a todos o seu compromiso de traballo e adicación permanente, así como o seu esforzo para coñecer os problemas reais dos galegos e as necesidades de quen solicita o amparo da institución: “Sen dúbida o pobo galego ten problemas no exercicio dos seus dereitos, como calquera outro, pero dispón dun capital humano capaz de enfrontalos. Eu confío neles”, concluiu.

The comments are closed.


GABINETE DE COMUNICACIÓN

Rúa do Hórreo, 65
15700 Santiago de Compostela
A Coruña
Teléfono [+34] 981 56 97 40
FAX [+34] 981 57 23 35

comunicacion@valedordopobo.gal