Montserrat Terceiro, membro da Rede de Cidadanía Activa de Dano Cerebral Galicia, expuxo as peticións que a entidade considera prioritarias para a nova lexislatura do Parlamento de Galicia. Estas demandas céntranse en eidos como a atención e coordinación sociosanitaria, a promoción da vida independente e a desinstitucionalización ou a accesibilidade universal. Ademais, instaron a creación dunha comisión permanente sobre discapacidade na Cámara.

A valedora do pobo, Dolores Fernández, destacou que os poderes públicos son garantes do dereito a unha vida digna. En consecuencia, defendeu poñer as persoas que están nas marxes e que non gozan plenamente dese dereito, como as persoas con dano cerebral, no centro das políticas públicas. Así, non deixando ninguén atrás, é a única forma en que podemos avanzar como sociedade, afirmou a alta comisionada.

O acto contou coa presenza de representantes dos grupos parlamentarios, da Administración autonómica, nomeadamente nas áreas de Política Social, Igualdade e Sanidade, de colexios e entidades profesionais, do terceiro sector de acción social e das asociacións de dano cerebral federadas ao acubillo do paraugas de Dano Cerebral Galicia.

La entrada Dano Cerebral Galicia presenta as súas reivindicacións para a próxima lexislatura do Parlamento de Galicia na Valedora do Pobo se publicó primero en Valedora do Pobo.

A ELA é unha enfermidade imprevisible na súa orixe; pero moi previsible na evolución, e o tempo corre en contra das persoas que a padecen. Ademais, deben terse en conta os coidados moi especiais e permanentes, que, chegado un momento, van ser imprescindibles. Esta singularidade da ELA urxe que se acurten e simplifiquen os trámites para que se faciliten a atención, os coidados e as prestacións que en cada caso sexan precisas, sen desfasamentos entre esta situación e a resposta das Administracións. As persoas con ELA non poden esperar nin sufrir, ademais da enfermidade, o desamparo do sistema, que as expulsa simplemente por sometelas a normas que contemplan a discapacidade dun modo “normativo”.

As persoas que padecen ELA están nas marxes dun sistema que non as protexe e iso tamén o apreciamos en queixas e actuacións que iniciamos de oficio.

• En 2023, interesámonos por unha persoa enferma de ELA que non puido embarcar no aeroporto da Coruña dado que a compañía aérea non puido subir a súa cadeira de rodas á aeronave. Finalmente, a empresa desculpouse, indemnizou o pasaxeiro e modificou os seus protocolos e o seu material para evitar que se producise un caso parecido no futuro.
• Así mesmo, a Consellería de Sanidade aceptou a nosa suxestión para que axilizase a confirmación dos diagnósticos por mor do caso dun paciente que tivo que esperar máis de catro meses desde que se lle comunicou que era probable que tivese ELA. Nestes casos, o tempo é fundamental; tamén para acceder ás axudas de accesibilidade.
• Finalmente, remitímoslle ao Defensor del Pueblo unha queixa relativa a un equipo de avaliación que só lle recoñecía a incapacidade permanente total (é dicir, aquela que permite seguir desempeñando outros traballos distintos ao que se realizaba) a un enfermo de ELA, malia a súa amplísima carreira de cotización, porque aplicaba un protocolo que ignoraba completamente a sintomatoloxía da ELA de orixe bulbar. A Administración modificou a súa actuación nun curto período de tempo.

Por outra banda, é necesario lembrar que as persoas con discapacidade (tamén as persoas con ELA) teñen dereito a vivir dignamente, o que abrangue o dereito para recibir atención e coidados. Cando, pola evolución da enfermidade, sexan necesarias intervencións para seguir vivindo, as persoas con ELA non poden verse condicionadas polo custo dos tratamentos ou dos apoios que necesiten. Nestes momentos, deben contar coa información e cos recursos que precisen a fin de adoptar unha decisión libre.

Deste xeito, poñendo as persoas con ELA no centro das políticas públicas, reduciríanse os factores de discriminación e interseccionalidade que as afectan e, con iso, avanzaríase na protección que o sistema lles pode proporcionar. Ademais, poñéndoas no centro das políticas públicas, visibilizaríanse tamén todas aquelas persoas con enfermidades que poidan requirir apoios, coidados, atención e tratamento nalgún momento. É perentorio que os poderes públicos lles garantan a todas elas o dereito a unha vida digna.

Finalmente, con motivo do Día Internacional da Loita contra a Esclerose Lateral Amiotrófica, a Confederación Nacional de Entidades de ELA publicou un manifesto accesible aquí.

La entrada 21 de xuño, Día Mundial da Loita contra a Esclerose Lateral Amiotrófica se publicó primero en Valedora do Pobo.

A Valedora segue conseguindo obxectivos. Quedou aceptada a normativa que permite ás persoas incapacitadas xudicialmente o acceso a unha vivenda pública.

A Valedora do Pobo, Milagros Otero Parga, concluíu de maneira favorable a queixa dun particular sobre a imposibilidade de acceso a unha vivenda pública dunha persoa con discapacidade psíquica do 65% con incapacidade xudicial total. Como resultado da investigación a Xunta valorará unha modificación normativa, instada por recomendación da Valedora, que eliminará o requisito de que os demandantes deste tipo de vivenda deban ter “plena capacidade de obrar” garantindo o seu acceso á vivenda pública.

Artigo 10 do Decreto 253/2007:

Este artigo regula o réxime xurídico do chan e das edificacións promovidas polo Instituto Galego dá Vivenda e so incluía como un dos requisitos comúns a todos os adxudicatarios a “plena capacidade de obrar”.

A criterio da Valedora esta limitación estaba a vulnerar os dereitos legalmente recoñecidos das persoas con discapacidade, partindo xa dos consagrados na Convención Internacional dos dereitos das persoas con discapacidade. “A práctica totalidade das persoas incapacitadas son persoas con discapacidade”, afirma a Valedora, quen engade por tanto que:

“a disposición que tratamos afecta a persoas con discapacidade, polo que resulta necesaria a aplicación das normas internacionais e nacionais sobre os seus dereitos, e estas prevén o descarte do anterior modelo de substitución na toma de decisións e a aplicación dun modelo de apoio que respecte os seus dereitos fundamentais”.

A Valedora defendeu, no marco da súa actuación ante o caso dun particular, unha modificación da normativa autonómica para garantir que as persoas con discapacidade cognitiva poidan acceder ao parque de vivendas de promoción pública, en igualdade co resto da poboación, con atención aos apoios que poidan precisar e que se establezan xudicialmente.

A actuación da Valedora culminou coa remisión dunha recomendación á Consellería de lnfraestruturas e Vivenda para que se modifique o artigo 10 do Decreto 253/2007, que establece como condición para a compra, arrendamento ou arrendamento con opción de compra das vivendas de promoción pública a plena capacidade de obrar, o que vulnera os dereitos legalmente recoñecidos das persoas con discapacidade”.

O pasado 26 de novembro o departamento da Xunta de Galicia enviou unha comunicación na que acepta expresamente o contido da recomendación

Acéptase finalmente a recomendación da valedoría nestes termos:

“No marco do estado actual de tramitación do anteproxecto de decreto de desenvolvemento da Lei 8/2012, de vivenda de Galicia, valórase a modificación do este requisito da plena capacidade de obrar para ser adxudicatario dunha vivenda de promoción pública, na liña indicada na recomendación da Valedora”.

A Consellería modificará a normativa regulamentaria en materia de vivendas de promoción pública e suprimirá o requisito da “plena capacidade”. Substituirao por outro que sexa respectuoso cos dereitos das persoas con discapacidade e que faga referencia ás condicións individuais para obrar que se establezan en cada resolución xudicial e, en especial, á actuación cos apoios precisos.

“O libre exercicio das capacidades de elección cos apoios precisados en cada caso resulta unha condición indispensable para o respecto da dignidade das persoas con discapacidade”.

Así concluíu a Valedora do Pobo, que vixiará a efectividade destas medidas.

Santiago de Compostela, 26 de novembro de 2018 .

La entrada Permítese ás persoas incapacitadas Xudicialmente o acceso a unha vivenda. se publicó primero en Valedora do Pobo.

(ver convocatoria aquí)

A comisión de Selección está formada por:

• Presidencia:
  • Mª José Castro Carballal (Xefa de Servizo de Administración e Persoal da Valedora do Pobo)
    • Suplente: Santiago González Serrano

• Vogais:
  • Antonio Hernández Fernández (director de Saúde Mental-Feafes Galicia)
    • Suplente: Carina Fernández Rivera
  • Cristina Terrón Pérez (designada polos sindicatos máis representativos)

• Secretaría:
  • Elena Natalia Aller Fajardo (Xefa de Sección da Valedora do Pobo)
    • Suplente: Pilar Sobredo Mata

La entrada Convócanse dúas bolsas destinadas a persoas con discapacidade psíquica. se publicó primero en Valedora do Pobo.

Desde esta perspectiva, é necesario actuar tanto na mellora das normas, como na vixilancia da aplicación efectiva das normas. Na mellora das normas, hai algúns aspectos a destacar. A derrogación da esterilización debería ser unha das reformas inaprazables. Igualmente a mellora da lei orgánica de violencia de xénero coa finalidade de evitar as situacións de discriminación interseccional: neste aspecto cumpriría levar a efecto as propostas contidas no Pacto de Estado contra a Violencia de Xénero. Recomendamos aos colexios da avogacía, e estes o aceptaron, formación e capacitación dos colexiados en igualdade e violencia o que inclúe as propostas específicas do pacto do Congreso e o Senado en materia de violencia contra colectivos especialmente vulnerables e contra vítimas persoas con discapacidade. Os colexios aceptaron a recomendación.

De novo o RD 1917/1999 sobre valoración da discapacidade presenta problemas, agora desde a perspectiva de xénero e discapacidade, ao non contemplar enfermidades feminizadas: o caso paradigmático é a fibromialxia. Sobre esta cuestión estase a tramitar unha queixa dunha muller que cada vez está peor, pero o seu grao de discapacidade en vez de aumentar, diminúe.

Tamén é necesaria a vixilancia da aplicación efectiva das normas na medida en que as mulleres con discapacidade se atopan con dificultades para facer valer os seus dereitos derivados: as veces pola súa discapacidade -por exemplo, unha muller con discapacidade intelectual pode non ser consciente dos malos tratos continuados que sofre, de aí a importancia das campañas públicas dirixidas aos colectivos máis vulnerables-. A Secretaría Xeral de Igualdade fixo unha guía sobre violencia contra as mulleres cos discapacidade, onde recolle a violencia física, a sexual, a estrutural, a psicolóxica, a económica, a obstétrica e a cultural; outras veces pola falta de medios -por exemplo, por non haber medios alternativos para as mulleres xordas ao teléfono de asistencia as vítimas, ou por non dispor de intérpretes da lingua de signos nas dependencias administrativas, policiais ou xudiciais-. Hai un convenio de colaboración entre a Secretaría Xeral de Igualdade e a Federación de asociacións de persoas xordas para garantir unha atención integral as mulleres xerado no marco do pacto de Estado contra a violencia de xénero; e mesmo tamén polos propios prexuízos que sofren as mulleres con discapacidade -por exemplo, restándolle credibilidade á súa declaración ao priorizar que se trata dunha muller que ten unha discapacidade-. Hai pouco tivemos unha xuntanza coa entidade Ecos do Sur, na que fixeron referencia a un caso dunha muller nixeriana, vítima de trata, cunha patoloxia psiquiátrica precisamente por ser vítima de trata, e o caso foi sobreseido ao non lle dar ceredibilidade a testemuña da vítima.

Finalmente, a implementación efectiva do modelo social obriga a actuar, no só no eido normativo e na vixilancia da aplicación efectiva das normas, tamén na concienciación para o cambio de modelo. A persistencia na sociedade de prexuízos reflíctese en episodios aparentemente puntuais pero demostrativos da existencia dun problema estrutural. É moi significativo que a discapacidade sexa o segundo motivo de delitos de odio en España. Ou que a discapacidade sexa o detonante de moitos acosos contra nenos e nenas nos centros escolares. Os poderes públicos deben loitar contra a discafobia (medo irracional, odio e discriminación contra as persoas con discapacidade).

Remato xa. Volvo a agradecer a oportunidade que se me deu de comparecer ante esta Comisión, e quedo a súa disposición para as aclaracións que teñan por conveniente realizar.

La entrada Seguimento das políticas relativas á discapacidade se publicó primero en Valedora do Pobo.

Ao respecto a Valedora do Pobo cre necesario deixar constancia firme de que as diferentes medidas legais, protocolos e recomendacións relacionados coa crise sanitaria do COVID-19 deben interpretarse de tal xeito que en ningún caso supoñan a vulneración dos dereitos e/ou o menoscabo da dignidade das persoas con diversidade funcional.

Neste senso, as nenas, os nenos e en xeral todas as persoas con alteracións conductuais as que o confinamento afecte negativa e significativamente teñen o dereito a deambular polos espazos públicos cumprindo as medidas precisas e proporcionais para previr no posible os contaxios.

É necesario facer un chamamento a toda a sociedade para que se respecte o citado dereito, e tamén ás autoridades das diferentes administracións para que o fagan respectar.

Debe quedar patente que se desbota calquera medida de identificación externa das persoas con diversidade funcional, posto que resultaría claramente lesiva dos seus dereitos e un ataque intolerable a súa dignidade.

Santiago de Compostela, a 15 de abril de 2020.

La entrada Respectar o dereito de deambulación de determinadas persoas con diversidade funcional. se publicó primero en Valedora do Pobo.

INVESTIGACIÓNS DE OFICIO

Iniciamos investigacións de oficio en varios ámbitos relacionados coa pandemia. Destacamos: unha primeira actuación para comprobar a accesibilidade e atención dos Centros de Información á Muller durante o estado de alarma; as dificultades para solicitar axudas por violencia de xénero dada a carencia de certificados dixitais e a imposibilidade de acudir aos servizos de maneira presencial; para manter as prestacións de inclusión social e acelerar as pendentes de resolución durante o estado de alarma; actuacións en materia de vivenda ante a crise sanitaria derivada da Covid-19; a situación do sector marisqueiro galego pola crise da Covid-19; o estado de tramitación das axudas ás entidades de defensa dos dereitos das persoas con discapacidade; as medidas adoptadas para a recollida de residuos de pacientes en illamento domiciliario pola Covid-19; e a prórroga do tempo de permanencia nunha vivenda expropiada para a construción dun parque público, acordando a entrega das chaves cando finalice do estado de alarma.

TRAMITACIÓN INMEDIATA

A Institución recibiu varias queixas en relación coa pandemia, que, conxugando urxencia e menor impacto procedimental, tramitou coa precisa inmediatez e ausencia de formalismo.

Nalgúns casos, a situación afecta a colectivos ou persoas en situación de especial vulnerabilidade. Así sucede no caso da falta dun servizo diario e as 24 horas de intérprete de lingua de signos para a atención sanitaria das persoas xordas, así como as carencias de accesibilidade para esas persoas na información necesaria para loitar contra o coronavirus; no mesmo sentido, a dificultade para acceder a medios de subsistencia das familias dedicadas á actividade de venda ambulante; o corte da subministración eléctrica durante a vixencia de estado de alarma; ou a falta de subministracións alimenticias ou de primeira necesidade ás persoas que os recibían de entidades sociais.

Algunhas das máis importantes cuestións sinaladas relativas a investigacións de oficio e queixas xa tiveron unha resposta positiva por parte das administracións competentes.

OUTROS ASUNTOS

Outros asuntos abordados nas queixas son: a exclusión das axudas pola Covid-19 aos autónomos en réxime de estimación por módulos; a falta de medidas en relación coa persistencia da obrigación de pago de alugueres nos pisos de estudantes que se desocuparon durante o estado de alarma, a diferenza das medidas adoptadas na rede universitaria de residencias; a alegación da falta de garantía de dereitos dixitais en amplas zonas do rural galego, con insuficiencia de cobertura de internet ou ancho de banda, o que ocasiona problemas para continuar a formación académica on line ou a realización de tarefas escolares; ou a restricións de mobilidade en relación cos acompañantes dos enfermos oncolóxicos que reciben tratamento de quimioterapia.

Na loita contra a pandemia hai que protexer a saúde das persoas, coidar aos que nos coidan, dar atención aos colectivos vulnerables e desfavorecidos, e sentar as bases para un restablecemento sólido da actividade.

As inquietudes relativas á ausencia de equipos de protección e de probas PCR foron comunicadas á Valedora desde o momento inicial da declaración do estado de alarma. Tramitamos as queixas e iniciamos investigacións de oficio para abordar a cuestión exposta en relación co persoal sanitario, sociosanitario e de axuda no fogar. En caso de denuncia de ausencia de EPIS en empresas privadas informamos sobre a posibilidade de poñer os feitos en coñecemento da inspección de traballo. Contactamos tamén co Defensor do Pobo, á vista de que a normativa emanada do Estado establecía condicións relativas ao manexo do material.

As persoas maiores sofren un maior risco pola Covid-19 que as converte en persoas especialmente vulnerables. Recibimos tamén queixas sobre a situación dalgunhas residencias de persoas maiores. Tramitamos as queixas e iniciamos investigación de oficio para coñecer con detalle as actuacións que se están levando a cabo.

En todas aquelas actuacións e servizos que quedaron sometidos ás autoridades competentes sinaladas no Real Decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada pola Covid-19, trasladamos o asunto ao Defensor del Pueblo, en aplicación dos principios básicos de coordinación e cooperación previstos no artigo 12.2 da Lei Orgánica 3/1981, respectando sempre o establecido na Constitución e no Estatuto de Autonomía.

Iniciamos investigación que trasladamos ao Defensor sobre a necesidade de modificar o Real Decreto 463/2020 para incluír unha regulación sobre a suspensión do réxime de visitas durante o estado de alarma. Trasladamos ao Defensor a queixa sobre a discriminación polas diferentes medidas adoptadas polo Goberno para a protección das persoas cun ERTE e os que son obxecto de despedimento definitivo en contratos temporais. Noutros casos trasladamos ao Defensor a situación de empregados de empresas públicas ou sociedades estatais con particulares circunstancias por mor da pandemia, ou as propostas de sanción por incumprimento do deber de confinamento cando concorrían circunstancias excepcionais, pero non previstas entre as actividades permitidas tras a limitación da liberdade de circulación.

COMUNICADOS PÚBLICOS

A Institución emitiu comunicados públicos coa finalidade de liquidar problemas que xurdiron ou puidesen xurdir con relación á pandemia. Fixemos un comunicado chamando á solidariedade e á responsabilidade para evitar determinadas condutas discriminatorias cara a determinados colectivos, particularmente cara ao pobo xitano. Tamén difundimos unha comunicación sobre os dereitos das persoas con discapacidade na emerxencia sanitaria, na que entre outras cousas resaltamos a importancia manter un contacto permanente coas entidades de defensa deses dereitos, o que pola nosa banda estamos a facer de forma directa e frecuente. Hoxe mesmo, 8 de abril, celébrase o día do pobo xitano, polo que emitimos un comunicado de apoio con esa ocasión, chamando a atención sobre a necesidade de remover os prexuízos e de promover a inclusión contando coas mulleres, os homes, as nenas e os nenos xitanos (o detalle desas comunicacións atópase na nosa web).

FALAMOS DE FEMINISMO

O foro “FALAMOS DE FEMINISMO” mantívose activo e subimos dúas publicacións sobre “muller e coronavirus”. Difundimos as recomendacións das autoridades sanitarias sobre a situación das mulleres embarazadas e as pautas a seguir cos recentemente nacidos con “Covid-19”.

REFORZAMOS O NOSO COMPROMISO

A Valedora é consciente da extrema situación que xerou a pandemia e que motivou a declaración do estado de alarma e de aí o propósito para que o noso labor en defensa dos dereitos dos cidadáns, nesta situación de emerxencia sanitaria e social, materializásese sen restar enerxía nin esforzos ás autoridades e ás persoas que, en primeira liña, ocúpanse da xestión das consecuencias da pandemia.

Reforzamos o noso compromiso informando a través deste comunicado e de comunicados sucesivos sobre as actuacións que levan a cabo relacionadas coa pandemia e o estado de alarma.

La entrada Reforzamos o noso traballo na Valedora do Pobo pola Pandemia da Covid-19 se publicó primero en Valedora do Pobo.

Tamén resaltou que a información sobre a contención do COVID-19 debe ser accesible mediante tradución á lingua de signos ou por calquera outro medio ou formato necesario, e puxo de relevo que as organizacións de persoas con discapacidade deben ser consultadas e estar involucradas en todas as etapas da resposta ao COVID-19.

Son necesarias medidas adicionais para a protección social das persoas con discapacidade; en especial deben ter a garantía de que a súa supervivencia é considerada prioritaria e que os protocolos garanten que “cando os recursos sexan limitados non se lles discrimine no acceso á saúde, incluíndo as medidas para salvar vidas”.

A comisionada da ONU concluíu que as autoridades “teñen unha maior responsabilidade con esta poboación debido á discriminación estrutural que enfrontan”.

A Institución da Valedora do Pobo subliña a súa plena coincidencia coas orientacións da relatora da ONU. Nese senso está a realizar a súa labor de promoción e garantía dos dereitos das persoas con discapacidade por medio de actuacións de oficio, queixas e co contacto coas entidades de defensa dos seus dereitos.

Coas entidades déronse anteriores contactos. Coincidindo co comunicado da relatora da ONU novamente puxémonos en comunicación co vicepresidente do CERMI, o presidente da federación de asociacións de persoas xordas de Galicia, para ofrecer a nosa colaboración en caso de que se coñezan situacións que merezan ser avaliadas para a preservación dos dereitos das persoas con discapacidade na actual situación de emerxencia.

O representante do CERMI transmitiu que neste intre considera que para a mellor defensa dos dereitos das persoas con discapacidade debe garantirse a plena accesibilidade das comunicacións na atención ás persoas con discapacidade, asunto que a Valedora do Pobo ven coñecendo a través dunha actuación de oficio.

A través desta comunicación fluída e permanente coas entidades de defensa dos dereitos das persoas con discapacidade a Valedora do Pobo permanecerá atenta a calquera problema que poda afectar a esas persoas na actual situación de emerxencia.

Santiago de Compostela, 6 de abril de 2020.

La entrada Sobre os dereitos das persoas con discapacidade na emerxencia sanitaria se publicó primero en Valedora do Pobo.

Protagonistas do encontro, puxeron cara as distintas realidades con motivos da investigación que está a facer a Oficina de Dereitos Humanos dás Nacións Unidas en España.

Rematado o acto co relator de Nacions Unidas, A Valedora do Pobo con todo ou seu equipo, continuaron co encontro, para coñecer con mais detalle, as inquedanzas e os problemas expresados na xuntanza.

O relator de Nacións Unidas, comunicou a EAPN Galicia e a Valedora do Pobo o seguinte: “ Foi unha experiencia realmente gratificante para o equipo. Atopámolo moi significativo e informativo, e estamos moi agradecidos con todos os participantes que compartiron e cos organizadores. É bo saber que a reunión pode contribuir a unha maior colaboración nestes temas”.

La entrada Reunión entre a Valedora do Pobo, Dores Fernández Galiño e Philip Alston, Relator sobre pobreza extrema e Dereitos humanos da ONU se publicó primero en Valedora do Pobo.

O avance que supuxo a convención e a lexislación que a seguiu ponse de relevo se temos en conta que hai ben pouco tempo aludíase á discapacidade como supostos “defectos”, “deficiencias”, “enfermidades” ou “padecementos”, ou ás persoas con discapacidade como “minusvalidos”.

Mesmos seguimos atopando sinais, carteis e rótulos que utilizan esa linguaxe contraria á dignidade inherente a calquera persoa, fel reflexo de ideas que conducían directamente á vulneración de dereitos básicos.

O vello modelo médico no que se baseaba a terminoloxía da discriminación consideraba que moitas persoas “padecían” dificultades e por iso debían ser “substituídos” por completo, “incapacitados”, e por tanto privados da súa personalidade e capacidade, coa imposibilidade de exercer os seus dereitos como consecuencia lóxica.

Fronte a iso hoxe afirmamos con rotundidade que a orixe das barreiras se atopa na actitude da sociedade respecto das circunstancias das persoas con discapacidade, e que somos as persoas que conformamos maioritariamente a sociedade as que creamos as barreiras e a discriminación.

Pero os vellos tempos dos plantexamentos discriminatorios non son tan vellos; ata hai ben pouco moitas persoas con discapacidade estaban privadas dun dereito democrático tan básico como o voto, e só hai pouco eliminouse esa grave e inexplicable anomalía social.

Aínda que os avances son evidentes, hoxe é o momento de recordar que o camiño por percorrer é amplo e permanecen moitas carencias en materia de inclusión laboral, educativa, cultural, no desfrute do ocio, na mobilidade e na accesibilidade universal. A todas esas carencias dedicamos especial atención na Valedora do Pobo, non só porque iso forma parte da nosa esencia, senón tamén porque a atención preferente das persoas con discapacidade é unha obriga constitucional e por tanto os poderes públicos deben prestar a atención especializada que requiran, e amparalos especialmente para que gocen dos dereitos que recoñecen a Constitución e o noso Estatuto de Autonomía.

A actividade da Valedora ten un dos seus principais eixos na promoción e defensa dos dereitos das persoas con discapacidade, como o mostran os seus informes anuais, os informes especiais sobre persoas con discapacidade intelectual e sobre accesibilidade universal, un elevado número de queixas, moitas de oficio, e a procura dun contacto permanente coas entidades de protección deses dereitos. A través desa intensa actividade día a día comprobamos que os retos de futuro son moitos e de moita entidade, e que é preciso recordar aos poderes públicos e á sociedade que unha política pública orientada á protección dos dereitos e á inclusión é unha esixencia propia do Estado Social e Democrático de Dereito.

La entrada Día internacional das persoas con discapacidade se publicó primero en Valedora do Pobo.